ਸਰਕਾਰ ਨੇ ਕਸਟਮ ਹਾਇਰਿੰਗ ਸੈਂਟਰਾਂ, ਸਹਿਕਾਰੀ ਸਭਾਵਾਂ ਅਤੇ ਪੰਚਾਇਤਾਂ ਰਾਹੀਂ ਖੇਤੀ ਸਬੰਧੀ ਮਸ਼ੀਨਰੀ ਕਿਰਾਏ ‘ਤੇ ਲੈਣ ਲਈ ਰੇਟ ਕੀਤੇ ਨਿਰਧਾਰਿਤ - ਡਿਪਟੀ ਕਮਿਸ਼ਨਰ
ਐਸ.ਏ.ਐਸ. ਨਗਰ ਅਕਤੂਬਰ 05 :
ਪੰਜਾਬ ਸਰਕਾਰ ਵਲੋਂ ਪਰਾਲੀ ਨੂੰ ਅੱਗ ਲਗਾਉਣ ਦੀ ਥਾਂ ਖੇਤਾਂ ਵਿੱਚ ਹੀ ਮਿਲਾ ਕੇ ਵਾਤਾਵਰਣ ਸੰਭਾਲ ਦੇ ਨਾਲ-ਨਾਲ ਜ਼ਮੀਨ ਦੀ ਸਿਹਤ ਸੁਧਾਰਨ ਵਿੱਚ ਕਿਸਾਨੀ ਨੂੰ ਸਹੂਲਤ ਪ੍ਰਦਾਨ ਕਰਨ ਦੇ ਮਕਸਦ ਨਾਲ ਕਸਟਮ ਹਾਇਰਿੰਗ ਸੈਂਟਰਾਂ , ਸਹਿਕਾਰੀ ਸਭਾਵਾਂ ਅਤੇ ਪੰਚਾਇਤਾਂ ਰਾਹੀਂ ਖੇਤੀ ਸਬੰਧੀ ਮਸ਼ੀਨਰੀ ਕਿਰਾਏ ‘ਤੇ ਲੈਣ ਲਈ ਰੇਟ ਨਿਰਧਾਰਿਤ ਕੀਤੇ ਗਏ ਹਨ।
ਡਿਪਟੀ ਕਮਿਸ਼ਨਰ ਗਰੀਸ਼ ਦਿਆਲਨ ਨੇ ਦੱਸਿਆ ਕਿ ਜ਼ਿਲਾ ਐਸ.ਏ.ਐਸ. ਨਗਰ ਵਿੱਚ ਕਿਸਾਨਾਂ ਦੀ ਸਹੂਲਤ ਅਤੇ ਪਰਾਲੀ ਦੇ ਸੁਚੱਜੇ ਪ੍ਰਬੰਧਾਂ ਲਈ ਕੁੱਲ 30 ਕਸਟਮ ਹਾਇਰਿੰਗ ਸੈਂਟਰ ਹਨ,ਜਿਨਾਂ ਕੋਲੋਂ ਕਿਸਾਨ ਆਪਣੀ ਸਹੂਲਤ ਅਨੁਸਾਰ ਪਰਾਲੀ ਨੂੰ ਜਮੀਨ ਵਿੱਚ ਵਾਹ ਕੇ ਖੇਤ ਤਿਆਰ ਕਰਨ ਲਈ ਮਸ਼ੀਨਰੀ ਲੈ ਸਕਦੇ ਹਨ। ਇਸ ਤੋਂ ਇਲਾਵਾ ਜਿਲ੍ਹੇ ਦੀਆ 67 ਸਹਿਕਾਰੀ ਸਭਾਵਾਂ ਕੋਲੋਂ ਵੀ ਪਰਾਲੀ ਪ੍ਰਬੰਧਾਂ ਲਈ ਮਸ਼ੀਨਾਂ ਕਿਰਾਏ ਤੇ ਲਿਤੀਆ ਜਾ ਸਕਦੀਆਂ ਹਨ।
ਪੰਜਾਬ ਸਰਕਾਰ ਵਲੋਂ ਨਿਰਧਾਰਿਤ ਰੇਟ ਅਨੁਸਾਰ ਟਰੈਕਟਰ ਸਮੇਤ ਮਸ਼ੀਨਰੀ ਕਿਰਾਏ ‘ਤੇ ਲੈਣ ਲਈ ਹੈਪੀ ਸੀਡਰ ਲਈ 1300 ਰੁਪਏ ਪ੍ਰਤੀ ਏਕੜ , ਦੋ ਫਲਾਂ ਵਾਲੇ ਉਲਟਾਵੇਂ ਹੱਲਾਂ ਲਈ 1200 ਰੁਪਏ , ਤਿੰਨ ਵਾਲੇ ਲਈ 1500 ਰੁਪਏ, ਮੁੱਢ ਵੱਢਣ ਵਾਲਾ ਰੀਪਰ 400 ਰੁਪਏ, ਮਲਚਰ 1200 ਰੁਪਏ , ਸਟਰਾਅ ਚੋਪਰ 1500 ਰੁਪਏ , ਜ਼ੀਰੋ ਟਿੱਲ ਡਰਿੱਲ 600 ਰੁਪਏ, ਸੁਪਰ ਸੀਡਰ 1600 ਤੋਂ 2000 ਰੁਪਏ ਪ੍ਰਤੀ ਏਕੜ ਨਿਰਧਾਰਿਤ ਕੀਤੇ ਗਏ ਹਨ।
ਇਸ ਤੋਂ ਇਲਾਵਾ ਟਰੈਕਟਰ ਤੋਂ ਬਿਨਾਂ ਖੇਤੀ ਸੰਦ ਕਿਰਾਏ ‘ਤੇ ਲੈਣ ਲਈ ਹੈਪੀ ਸੀਡਰ ਅਤੇ ਦੋ ਫਲਾਂ ਵਾਲੇ ਉਲਟਾਵੇਂ ਹੱਲ 200 ਰੁਪਏ ਪ੍ਰਤੀ ਘੰਟਾ, ਮੁੱਢ ਵੱਢਣ ਲਈ ਰੀਪਰ 100 ਰੁਪਏ ਪ੍ਰਤੀ ਘੰਟਾ, ਮਲਚਰ 200 ਰੁਪਏ ਪਤੀ ਘੰਟਾ, ਸਟਰਾਅ ਚੌਪਰ 250 ਰੁਪਏ , ਜੀਰੋ ਟਿੱਲ ਡਰਿੱਲ 100 ਰੁਪਏ ਪ੍ਰਤੀ ਘੰਟਾ, ਸੁਪਰ ਸੀਡਰ 400 ਤੋਂ 500 ਰੁਪਏ ਪ੍ਰਤੀ ਘੰਟਾ ਨਿਰਧਾਰਿਤ ਕੀਤੇ ਗਏ ਹਨ।
ਉਨਾਂ ਕਿਹਾ ਕਿ ਪੰਜਾਬ ਸਰਕਾਰ ਵਲੋਂ ਇਨਾਂ ਖੇਤੀ ਸੰਦਾਂ ਨੂੰ ਕਿਰਾਏ ਉਪਰ ਲੈਣ ਬਾਰੇ ਰੇਟ ਨਿਰਧਾਰਿਤ ਕਰਨ ਨਾਲ ਕਿਸਾਨਾਂ ਨੂੰ ਵੱਡਾ ਲਾਭ ਮਿਲੇਗਾ।
ਜ਼ਿਕਰਯੋਗ ਹੈ ਕਿ ਜ਼ਿਲੇ ਵਿੱਚ ਛੋਟੇ ਅਤੇ ਦਰਮਿਆਨੇ ਕਿਸਾਨਾਂ ਲਈ ਖੋਲੇ ਗਏ ਖੇਤੀ ਸਰਵਿਸ ਸੈਂਟਰ ਵਿੱਚ 88 , ਸਹਿਕਾਰੀ ਸਭਾਵਾਂ ਕੋਲ 300 ਮਸ਼ੀਨਾਂ ਹਨ , ਇਸ ਤੋਂ ਇਲਾਵਾ ਜਿਲ੍ਹੇ ਦੇ ਕਿਸਾਨਾਂ ਕੋਲ 191 ਆਪਣੀਆ ਮਸ਼ੀਨਾਂ ਹਨ ਜੋ ਉਨ੍ਹਾਂ ਨੇ ਖੇਤੀਬਾੜੀ ਵਿਭਾਗ ਤੋਂ ਸਬਸਿਡੀ ਤੇ ਲਈਆ ਹਨ ਅਤੇ ਕਿਸਾਨਾਂ ਕੋਲ 4000 ਹੈਰੋ ਵੀ ਮੌਜੂਦ ਹਨ।