#ਮੀਂਹ_ਅਲਰਟ
ਪੰਜਾਬ 'ਚ ਬੇ-ਮੌਸਮੀ ਬਾਰਿਸ਼ ਤੇ ਗੜ੍ਹੇਮਾਰੀ ਦੀ ਉਮੀਦ:
ਤਕੜੇ ਵੈਸਟਰਨ ਡਿਸਟ੍ਬੇਂਸ ਦੇ ਆਗਮਨ ਨਾਲ 16-17 ਅਪ੍ਰੈਲ ਸਮੁੱਚੇ ਸੂਬੇ ਚ ਧੂੜ-ਤੂਫਾਨ ਤੇ ਗਰਜ-ਚਮਕ ਨਾਲ ਦਰਮਿਆਨੇ ਮੀਂਹ ਦੀ ਉਮੀਦ ਹੈ। ਤਕੜਾ ਵੈਸਟਰਨ ਡਿਸਟ੍ਬੇਂਸ ਕੱਲ੍ਹ ਪਾਕਿ ਪੁੱਜ ਜਾਵੇਗਾ ਜਿਸਦੇ ਅਸਰ ਵਜੋਂ ਕੱਲ੍ਹ ਤੋਂ ਬੱਦਲਵਾਈ ਚ ਵਾਧਾ ਹੋਣਾ ਸ਼ੁਰੂ ਹੋ ਜਾਵੇਗਾ। ਮਾਨਸਾ, ਬਰਨਾਲਾ, ਰਾਏਕੋਟ, ਸੰਗਰੂਰ, ਪਟਿਆਲਾ, ਮੋਗਾ, ਅੰਮ੍ਰਿਤਸਰ, ਗੁਰਦਾਸਪੁਰ, ਪਠਾਨਕੋਟ ਦੇ ਹਿੱਸਿਆਂ ਚ ਭਾਰੀ ਛਰਾਟੇ ਦੇਖੇ ਜਾਣਗੇ। ਇਨ੍ਹੀਂ ਥਾਈਂ ਮੋਟੇ ਬੇਰਾਂ ਜਿੱਡੇ ਗੜ੍ਹੇ ਪੈਣ ਤੋਂ ਵੀ ਇਨਕਾਰ ਨਹੀਂ। ਬੱਦਲਾਂ ਚ ਕੜਕਦੀ ਬਿਜਲੀ ਤੇ ਮੀਂਹ ਦੀਆਂ ਪੈਂਦੀਆ ਤੇਜ ਫੁਹਾਰਾਂ ਦਰਮਿਆਨ ਮੁੜ ਠੰਡ ਮਹਿਸੂਸ ਹੋਵੇਗੀ ਦਿਨ ਦਾ ਪਾਰਾ 25°C ਲਾਗੇ ਤੇ ਕੁਝ ਥਾਂਈ ਇਸ ਤੋਂ ਵੀ ਹੇਠ ਰਹਿ ਸਕਦਾ ਹੈ।
ਮਾਲਵਾ ਡਿਵੀਜਨ ਚ ਵਾਢੀ ਦਾ ਕੰਮ ਸ਼ੁਰੂ ਹੋ ਚੁੱਕਾ ਹੈ ਪਰ ਮੌਸਮ ਚ ਆ ਰਹੀ ਇਸ ਤਬਦੀਲੀ ਕਾਰਨ ਕੁਝ ਦਿਨ ਵਾਢੀ ਚ ਠੱਲ੍ਹ ਪਵੇਗੀ। 18 ਤੋਂ ਮੌਸਮ ਚ ਸੁਧਾਰ ਨਾਲ, ਮੌਸਮ ਫਿਰ ਵਾਢੀ ਲਈ ਮੂਫੀਦ ਹੋ ਜਾਵੇਗਾ ਤੇ ਇਸ ਤੋ ਅਗਲੇ ਦੋ ਚਾਰ ਦਿਨ ਮੌਸਮ ਸੁਹਾਵਣਾ ਰਹੇਗਾ।
ਪਿਛਲੇ ਦਿਨਾਂ ਵਾਂਗ ਕੱਲ੍ਹ ਦੇਰ ਸ਼ਾਮ ਸਰਹੱਦੀ ਖੇਤਰਾਂ ਚ ਕੁਝ ਥਾਂਈ ਕਾਰਵਾਈ ਸ਼ੁਰੂ ਹੋ ਸਕਦੀ ਹੈ। ਬਾਕੀ ਸੂਬੇ ਚ 16 ਅਪ੍ਰੈਲ ਸਵੇਰ ਤੇ ਦੁਪਹਿਰ ਤੋਂ ਕਾਰਵਾਈਆਂ ਦਾ ਆਰੰਭ ਹੋਵੇਗਾ।
ਦੱਸਣਯੋਗ ਹੈ ਕਿ ਵਿਸਾਖ ਚੜ੍ਹ ਚੁੱਕਾ ਹੈ ਤੇ ਹੁਣ ਅਸੀ ਧੂੜ ਭਰੀਆਂ ਹਨੇਰੀਆਂ ਦੇ ਮੌਸਮ ਚ ਦਾਖਲ ਹੋਣ ਜਾ ਰਹੇ ਹਾਂ। ਜਿਸ ਵਿੱਚ ਕੁਝ ਮਿੰਟਾਂ ਚ ਹੀ ਅਸਮਾਨ ਨੀਲੇ ਤੋਂ ਪੀਲਾ ਤੇ ਪੀਲੇ ਤੋਂ ਕਾਲਾ ਹੋ ਜਾਂਦਾ ਹੈ।
-ਜਾਰੀ ਕੀਤਾ: 8:06pm, 14 ਅਪ੍ਰੈਲ, 2019