ਹੁਣ ਤਕ ਸਿਰਫ ਦੋ ਵਾਰ ਹੋਈਆਂ ਸਰਪੰਚੀ ਦੀਆਂ ਚੋਣਾਂ ਇਸ ਪਿੰਡ ਚ - ਸਰਵ ਸੰਮਤੀ ਨਾਲ ਬਣੀ ਜ਼ਿਲ੍ਹੇ ਦੀ ਪਹਿਲੀ ਬੀਬੀ ਸਰਪੰਚ
ਰੋਹਿਤ ਗੁਪਤਾ
ਗੁਰਦਾਸਪੁਰ, 30 ਸਤੰਬਰ, 2024: ਜ਼ਿਲ੍ਹਾ ਗੁਰਦਾਸਪੁਰ ਦੇ ਪਿੰਡ ਔਗਰਾ ਦੇ ਲੋਕਾਂ ਨੇ ਸਰਵ ਸੰਮਤੀ ਨਾਲ ਪਹਿਲੀ ਮਹਿਲਾ ਸਰਪੰਚ ਚੁਣ ਕੇ ਮਿਸਾਲ ਕਾਇਮ ਕੀਤੀ ਹੈ। ਰਾਜਨਪ੍ਰੀਤ ਕੌਰ ਨਾਂ ਦੀ ਨੌਜਵਾਨ ਔਰਤ ਨੂੰ ਪਿੰਡ ਵਾਸੀਆ ਵੱਲੋਂ ਸਰਪੰਚਣੀ ਚੁਣਿਆ ਗਿਆ ਹੈ। ਉੱਥੇ ਹੀ ਉਸ ਦੇ ਨਾਲ ਦੋ ਹੋਰ ਮਹਿਲਾ ਪੰਚ ਅਤੇ ਤਿੰਨ ਪੁਰਸ਼ ਪੰਚ ਵੀ ਸਰਬ ਸੰਤੀ ਨਾਲ ਚੁਣ ਲਏ ਗਏ ਹਨ ।
ਇੱਥੇ ਇਹ ਵੀ ਦੱਸਣ ਯੋਗ ਹੈ ਕਿ ਜਦੋਂ ਦੀਆਂ ਪੰਚਾਇਤਾਂ ਬਣ ਰਹੀਆਂ ਹਨ, ਪਿੰਡ ਵਿੱਚ ਜ਼ਿਆਦਾਤਰ ਸਰਵ ਸੰਮਤੀ ਨਾਲ ਇਹ ਸਰਪੰਚ ਦੀ ਚੋਣ ਕੀਤੀ ਜਾ ਰਹੀ ਹੈ। ਸਿਰਫ ਦੋ ਵਾਰ ਪਿੰਡ ਵਿੱਚ ਚੋਣਾਂ ਹੋਈਆਂ ਹਨ। ਇਸ ਦੇ ਨਾਲ ਹੀ ਪਿੰਡ ਦੀ ਇੱਕ ਹੋਰ ਖਾਸੀਅਤ ਇਹ ਹੈ ਕਿ ਇਹ ਪਿੰਡ ਬਿਲਕੁਲ ਨਸ਼ਾ ਮੁਕਤ ਹੈ।
ਨਵੀਂ ਬਣੀ ਸਰਪੰਚ ਰਾਜਨਦੀਪ ਕੌਰ, ਪੰਚ ਸਲਵਿੰਦਰ ਕੌਰ ਅਤੇ ਪੰਚ ਰਸ਼ਪਾਲ ਸਿੰਘ ਨੇ ਦੱਸਿਆ ਕਿ ਭਾਰਤ ਦੇ ਆਜ਼ਾਦ ਹੋਣ ਤੋਂ ਬਾਅਦ ਜਦੋਂ ਦੀਆਂ ਪੰਚਾਇਤਾਂ ਬਣੀਆਂ ਹਨ, ਉਹਨਾਂ ਦੇ ਪਿੰਡ ਔਗਰਾ ਵਿਖੇ ਸਰਵ ਸੰਮਤੀ ਨਾਲ ਹੀ ਸਰਪੰਚ ਦੀ ਚੋਣ ਕੀਤੀ ਜਾਂਦੀ ਹੈ, ਸਿਰਫ ਦੋ ਵਾਰ ਹੀ ਚੋਣਾਂ ਕਰਾਉਣ ਦੀ ਲੋੜ ਪਈ ਹੈ। ਨਵੀਂ ਬਣੀ ਸਰਪੰਚ ਰਾਜਨਦੀਪ ਕੌਰ ਨੇ ਦੱਸਿਆ ਕਿ ਪਿੰਡ ਵਿੱਚ ਕੁਝ ਵਿਕਾਸ ਕਾਰਜ ਕਰਵਾਉਣ ਵਾਲੇ ਹਨ। ਜਿਵੇਂ ਪਾਣੀ ਦੇ ਨਿਕਾਸੀ ਦੀ ਸਮੱਸਿਆ ਹੈ, ਸ਼ਮਸ਼ਾਨ ਘਾਟ ਬਣਾਉਣ ਵਾਲਾ ਹੈ ਤੇ ਕੁਝ ਗਲੀਆਂ ਤੇ ਸੜਕਾਂ ਟੁੱਟ ਗਈਆਂ ਹਨ ਜਿਹਨਾਂ ਨੂੰ ਤਰਜੀਹ ਦੇ ਆਧਾਰ ’ਤੇ ਉਹ ਠੀਕ ਕਰਵਾਉਣਗੇ। ਇਸ ਦੇ ਨਾਲ ਹੀ ਪਿੰਡ ਵਾਸੀਆਂ ਅਤੇ ਪੰਚਾਂ ਦੇ ਸਹਿਯੋਗ ਅਤੇ ਸਲਾਹ ਮਸ਼ਵਰੇ ਨਾਲ ਹੀ ਉਹ ਹਰ ਕੰਮ ਕਰਨਗੇ।