ਸੰਜੀਵ ਸੂਦ
- 30 ਤੋਂ 40 ਰੁਪਏ ਦਾ ਵਿਕਦਾ ਹੈ ਇੱਕ ਆਂਡਾ
- ਦੇਸ਼ ਦੇ ਖਿਡਾਰੀਆਂ ਨੇ ਵੀ ਹੁਣ ਕੀਤਾ ਆਪਣੀ ਡਾਈਟ ਚ ਸ਼ਾਮਲ
ਲੁਧਿਆਣਾ, 27 ਨਵੰਬਰ 2020 - ਕੜਕਨਾਥ ਕਾਲੀ ਮੁਰਗੇ ਦੀ ਇਕ ਅਜਿਹੀ ਨਸਲ ਹੈ ਜਿਸ ਤੋਂ ਅੱਜ ਤੱਕ ਕਈ ਵਿਗਿਆਨੀ ਅਤੇ ਕਿਸਾਨ ਅਣਜਾਣ ਸਨ। ਪਰ ਇਹ ਨਸਲ ਹੁਣ ਲਗਾਤਾਰ ਪ੍ਰਸਿੱਧ ਹੁੰਦੀ ਜਾ ਰਹੀ ਹੈ। ਕਾਲੇ ਰੰਗ ਦੀਆਂ ਮੁਰਗੀਆਂ ਦੀ ਇਹ ਨਸਲ ਬਿਲਕੁਲ ਭਾਰਤ ਦੀ ਦੇਸੀ ਮਸਲ ਹੈ ਜਿਸ ਦਾ ਮੀਟ ਵੀ ਕਾਲੇ ਰੰਗ ਦਾ ਹੀ ਹੁੰਦਾ ਹੈ। ਇਸ ਦਾ ਆਂਡਾ ਇਨ੍ਹੀ ਦਿਨੀਂ ਬਾਜ਼ਾਰ ਵਿੱਚ ਕਾਫ਼ੀ ਪ੍ਰਚੱਲਿਤ ਹੈ। ਜਿਸ ਦੀ ਕੀਮਤ 30 ਰੁਪਏ ਤੋਂ ਲੈ ਕੇ 40 ਰੁਪਏ ਤੱਕ ਦੀ ਹੈ। ਗੁਰੂ ਅੰਗਦ ਦੇਵ ਵੈਟਨਰੀ ਯੂਨੀਵਰਸਿਟੀ ਦੇ ਪੋਲਟਰੀ ਫਾਰਮ 'ਚ ਮੁਰਗੀਆਂ ਦੀ ਇਹ ਨਸਲ ਪੋਲਟਰੀ ਫਾਰਮਰਸ ਦੀ ਖਿੱਚ ਦਾ ਕੇਂਦਰ ਬਣੀ ਹੋਈ ਹੈ। 40 ਰੁਪਏ ਦਾ ਇੱਕ ਚੂਚਾ ਹੈ ਇਸ ਦੇ ਅੰਡੇ ਵਿੱਚ ਇਨ੍ਹੀ ਤਾਕਤ ਹੈ ਕਿ ਹੁਣ ਦੇਸ਼ ਦੇ ਖਿਡਾਰੀ ਵੀ ਇਸ ਦੀ ਵਰਤੋਂ ਕਰਨ ਲੱਗੇ ਹਨ।
ਗੁਰੂ ਅੰਗਦ ਦੇਵ ਵੈਟਰਨਰੀ ਯੂਨੀਵਰਸਿਟੀ ਦੇ ਸਹਾਇਕ ਵਿਗਿਆਨੀ ਡਾ ਦੂਬੇ ਨੇ ਦੱਸਿਆ ਕਿ ਮੁਰਗੀਆਂ ਦੀ ਇਹ ਨਸਲ ਮੱਧ ਪ੍ਰਦੇਸ਼ ਤੇ ਝਾਰਖੰਡ ਇਲਾਕੇ ਦੀ ਹੈ ਅਤੇ ਜੰਗਲੀ ਲੋਕ ਪਹਿਲਾਂ ਇਸ ਦਾ ਸ਼ਿਕਾਰ ਕਰਦੇ ਸਨ ਜਿਸ ਤੋਂ ਬਾਅਦ ਇਸ ਨੂੰ ਪਾਲਣਾ ਉਨ੍ਹਾਂ ਵੱਲੋਂ ਸ਼ੁਰੂ ਕਰ ਦਿੱਤਾ ਗਿਆ। ਉਨ੍ਹਾਂ ਦੱਸਿਆ ਕੜਕਨਾਥ ਇਸ ਮੁਰਗੇ ਦਾ ਨਾਂਅ ਹੈ ਅਤੇ ਇਸ ਦਾ ਅੰਡਾ ਹੁਣ ਪੰਜਾਬ ਦੇ ਨਾਲ ਹੋਰਨਾਂ ਦੇਸ਼ ਦੇ ਹਿੱਸਿਆਂ ਦੇ ਵਿੱਚ ਵੀ ਕਾਫ਼ੀ ਪ੍ਰਸਿੱਧ ਅਤੇ ਉਸ ਦੀ ਡਿਮਾਂਡ ਵਧ ਗਈ ਹੈ। ਡਾ ਦੂਬੇ ਨੇ ਦੱਸਿਆ ਕਿ ਇਸ ਆਂਡੇ ਦੇ ਵਿੱਚ ਆਮ ਆਂਡੇ ਨਾਲੋਂ ਵੱਧ ਪ੍ਰੋਟੀਨ ਹੁੰਦਾ ਹੈ ਇਸ ਤੋਂ ਇਲਾਵਾ ਇਸ ਵਿੱਚ ਕੈਲੇਸਟਰੋਲ ਦੀ ਮਾਤਰਾ ਕਾਫ਼ੀ ਘੱਟ ਹੁੰਦੀ ਹੈ। ਉਨ੍ਹਾਂ ਦੱਸਿਆ ਕਿ ਇਹ ਨਸਲ ਬਾਕੀ ਨਸਲ ਤੋਂ ਬਿਲਕੁਲ ਵੱਖਰੀ ਹੈ। ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਨੂੰ ਬੀਮਾਰੀ ਵੀ ਕੋਈ ਜਲਦੀ ਨਹੀਂ ਲੱਗਦੀ ਇਨ੍ਹਾਂ ਦੀ ਡਾਈਟ ਆਮ ਵਰਗੀ ਹੈ ਪਰ ਉਨ੍ਹਾਂ ਨੂੰ ਪ੍ਰੋਟੀਨ ਜ਼ਿਆਦਾ ਦਿੱਤਾ ਜਾਂਦਾ ਹੈ।
ਉਨ੍ਹਾਂ ਦੱਸਿਆ ਕਿ ਇਸ ਕੜਕਨਾਥ ਮੁਰਗੇ ਦਾ ਰੰਗ ਭੂਰਾ ਕਾਲਾ ਹੁੰਦਾ ਹੈ ਅਤੇ ਇਹ ਇੱਕ ਦੂਜੇ ਨੂੰ ਵੀ ਖਾ ਜਾਂਦਾ ਹੈ ਇਸ ਕਰਕੇ ਇਸ ਨੂੰ ਹੋਰਨਾਂ ਮੁਰਗੇ ਦੀਆਂ ਪ੍ਰਜਾਤੀਆਂ ਦੇ ਨਾਲ ਨਹੀਂ ਰੱਖਣਾ ਚਾਹੀਦਾ। ਉਨ੍ਹਾਂ ਕਿਹਾ ਕਿ ਗੁਰੂ ਅੰਗਦ ਦੇਵ ਵੈਟਨਰੀ ਯੂਨੀਵਰਸਿਟੀ ਵੱਲੋਂ ਇਸ ਸਬੰਧੀ ਕਿਸਾਨਾਂ ਨੂੰ ਸਿਖਲਾਈ ਵੀ ਦਿੱਤੀ ਜਾਂਦੀ ਹੈ ਅਤੇ ਹੁਣ ਇਹ ਖਿਡਾਰੀਆਂ ਦੀ ਡਾਈਟ ਵਿੱਚ ਵੀ ਸ਼ਾਮਿਲ ਕਰ ਲਿਆ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਇਹ ਇੱਕ ਕਿਸਾਨਾਂ ਲਈ ਲਾਹੇਵੰਦ ਧੰਦਾ ਬਣ ਸਕਦਾ ਹੈ ਕਿਉਂਕਿ ਇਸਦਾ ਆਂਡਾ ਕਾਫ਼ੀ ਮਹਿੰਗਾ ਵਿਕਦਾ ਹੈ।