ਹਰਜਿੰਦਰ ਸਿੰਘ ਭੱਟੀ
- ਆਯੁਸ਼ਮਾਨ ਭਾਰਤ ਸਰਬੱਤ ਸਿਹਤ ਬੀਮਾ ਯੋਜਨਾ ਤਹਿਤ ਮਰੀਜ਼ਾਂ ਦੇ ਕੀਤੇ ਜਾਂਦੇ ਹਨ ਮੁਫ਼ਤ ਇਲਾਜ
- 89 ਵੱਡੀਆਂ ਸਰਜਰੀਆਂ ਨੂੰ ਸਿਵਲ ਹਸਪਤਾਲ ਵਿਖੇ ਕਰ ਪ੍ਰਾਪਤ ਕੀਤੀ ਸਫਲਤਾ
- ਜਰਨਲ ਸਰਜਰੀ, ਅੱਖਾਂ, ਈ.ਐਨ.ਟੀ. ਅਤੇ ਹੱਡੀਆਂ ਦੇ ਕੁਲ 67 ਮੁਫ਼ਤ ਅਪ੍ਰੇਸ਼ਨ ਸਰਬੱਤ ਸਿਹਤ ਬੀਮਾ ਯੋਜਨਾ ਦੇ ਅਧੀਨ ਹਸਪਤਾਲ ਵਿਖੇ ਕੀਤੇ
ਐਸ.ਏ.ਐਸ. ਨਗਰ, 9 ਮਾਰਚ 2021 - ਸਬ ਡਵੀਜ਼ਨ ਡੇਰਾਬੱਸੀ ਦੇ ਸਰਕਾਰੀ ਹਸਪਤਾਲ ਵਿੱਚ ਪਹਿਲੀ ਵਾਰ ਛਾਤੀ ਦੇ ਕੈਂਸਰ ਦਾ ਸਫ਼ਲ ਅਪ੍ਰੇਸ਼ਨ ਕੀਤਾ ਗਿਆ। ਇਸ ਬਾਰੇ ਜਾਣਕਾਰੀ ਦਿੰਦਿਆਂ ਡਾ. ਸੰਗੀਤਾ ਜੈਨ ਸੀਨੀਅਰ ਮੈਡੀਕਲ ਅਫ਼ਸਰ ਨੇ ਦੱਸਿਆ ਕਿ 60 ਸਾਲ ਦੀ ਡੇਰਾਬੱਸੀ ਵਾਸੀ ਇਸ ਔਰਤ ਨੂੰ ਛਾਤੀ ਦੇ ਸੱਜੇ ਪਾਸੇ ਵਿੱਚ ਕੈਂਸਰ ਦੀ ਗਿਲਟੀ ਸੀ। ਮਰੀਜ਼ ਦਾ ਕੈਂਸਰ ਦੂਜੇ ਪੜਾਅ ਤੇ ਪਹੁੰਚਿਆ ਹੋਇਆ ਸੀ। ਕਰੀਬ 10 ਦਿਨ ਪਹਿਲਾਂ ਇਹ ਮਰੀਜ਼ ਸਿਵਲ ਹਸਪਤਾਲ ਡੇਰਾਬੱਸੀ ਵਿਖੇ ਆਇਆ ਸੀ।
ਜਿਸ ਉਪਰੰਤ ਡਾ. ਕਰਨਬੀਰ ਸਿੰਘ ਸਮੇਤ ਤਿੰਨ ਮਾਹਿਰ ਡਾਕਟਰਾਂ ਦੀ ਟੀਮ ਨੇ ਇਸ ਮਰੀਜ਼ ਦਾ ਇਲਾਜ ਸ਼ੁਰੂ ਕੀਤਾ। ਬੀਤੇ ਦਿਨ ਕਰੀਬ 4 ਘੰਟੇ ਦਾ ਸਫ਼ਲ ਅਪ੍ਰੇ਼ਸਨ ਕਰਕੇ ਕੈਂਸਰ ਦੀ ਗਿਲਟੀ ਕੱਢੀ ਗਈ। ਉਨਾਂ ਦੱਸਿਆ ਕਿ ਪਹਿਲਾਂ ਇਸ ਤਰਾਂ ਦੇ ਅਪ੍ਰੇਸ਼ਨ ਲਈ ਮਰੀਜ਼ ਨੂੰ ਪੀ.ਜੀ.ਆਈ. ਚੰਡੀਗੜ੍ਹ ਜਾਂ ਜੀ.ਐਮ.ਸੀ.ਐਚ ਸੈਕਟਰ-32 ਵਿਖੇ ਜਾਣਾ ਪੈਂਦਾ ਸੀ ਜਿਸ ਨਾਲ ਮਰੀਜ਼ਾਂ ਨੂੰ ਕਾਫੀ ਪ੍ਰੇਸ਼ਾਨੀ ਝੱਲਣੀ ਪੈਂਦੀ ਸੀ। ਉਨਾਂ ਡਾਕਟਰਾਂ ਦੀ ਟੀਮ ਨੂੰ ਵੀ ਵਧਾਈ ਦਿੱਤੀ ਜਿਨਾਂ ਨੇ ਇਸ ਮੁਸ਼ਕਿਲ ਕੰਮ ਨੂੰ ਸਫ਼ਲਤਾ ਨਾਲ ਅੰਜ਼ਾਮ ਦਿੱਤਾ।
ਇਸ ਮੌਕੇ ਡਾ. ਕਰਨਬੀਰ ਸਿੰਘ ਨੇ ਕਿਹਾ ਕਿ ਸਿਵਲ ਹਸਪਤਾਲ ਵਿਖੇ ਅਜਿਹੇ ਮਰੀਜ਼ਾਂ ਦੀਆਂ ਨੂੰ ਚੰਗੀਆਂ ਸਿਹਤ ਸੇਵਾਵਾਂ ਅੱਗੋਂ ਵੀ ਦਿੱਤੀਆਂ ਜਾਂਦੀਆਂ ਰਹਿਣਗੀਆਂ। ਉਨਾਂ ਕਿਹਾ ਕਿ ਆਯੁਸ਼ਮਾਨ ਭਾਰਤ ਸਰਬੱਤ ਸਿਹਤ ਬੀਮਾ ਯੋਜਨਾ ਤਹਿਤ ਮਰੀਜ਼ਾਂ ਦਾ ਜਿੱਥੇ ਮੁਫ਼ਤ ਇਲਾਜ ਕੀਤਾ ਜਾਂਦਾ ਹੈ ਉਥੇ ਹੀ ਬਾਕੀ ਮਰੀਜ਼ਾਂ ਲਈ ਵੀ ਸਰਕਾਰ ਦੀਆਂ ਹਦਾਇਤਾਂ ਤਹਿਤ ਬਹੁਤ ਹੀ ਘੱਟ ਖ਼ਰਚੇ ਤੇ ਵੱਡੀਆਂ ਸਰਜਰੀਆਂ ਅਤੇ ਇਲਾਜ ਕੀਤੇ ਜਾ ਰਹੇ ਹਨ। ਉਨਾਂ ਦੱਸਿਆ ਕਿ ਮਹੀਨਾ ਫਰਵਰੀ ਤੋਂ ਹੁਣ ਤੱਕ ਕੁਲ 89 ਵੱਡੀਆਂ ਸਰਜਰੀਆਂ ਨੂੰ ਸਿਵਲ ਹਸਪਤਾਲ ਵਿਖੇ ਸਫਲਤਾ ਨਾਲ ਕੀਤਾ ਗਿਆ ਹੈ।
ਇਥੇ ਇਹ ਵੀ ਦੱਸਣਯੋਗ ਹੈ ਕਿ ਫਰਵਰੀ ਮਹੀਨੇ ਵਿੱਚ ਜਰਨਲ ਸਰਜਰੀ, ਅੱਖਾਂ, ਈ.ਐਨ.ਟੀ., ਅਤੇ ਹੱਡੀਆਂ ਦੇ ਕੁਲ 67 ਮੁਫ਼ਤ ਅਪ੍ਰੇਸ਼ਨ ਸਰਬੱਤ ਸਿਹਤ ਬੀਮਾ ਯੋਜਨਾ ਦੇ ਅਧੀਨ ਸਿਵਲ ਹਸਪਤਾਲ ਡੇਰਾਬੱਸੀ ਵਿਖੇ ਕੀਤੇ ਗਏ। ਇਸ ਸਕੀਮ ਤਹਿਤ ਫਰਵਰੀ ਮਹੀਨੇ ਵਿੱਚ ਲੋਕਾਂ ਨੂੰ 9 ਲੱਖ ਰੁਪਏ ਤੋਂ ਵੀ ਵੱਧ ਦੀਆਂ ਸਿਹਤ ਸੇਵਾਵਾਂ ਮੁਫ਼ਤ ਦਿੱਤੀਆਂ ਗਈਆਂ।